阿六讲：呢个规定嘅意思即系话，以后大家买嗰啲鸡，全部都系已经掹晒毛啲光鸡。呢个新规，目的就系预防禽流感，应该讲系合理嘅，不过，有个问题需解决，就系到时啲鸡冚扮冷都系冇毛冇翼，咁点样分出佢哋嘅“祖籍”（即鸡种）呢？

　　广州人最中意食嘅4种走地鸡：清远鸡、龙门胡须鸡、封开杏花鸡、湛江鸡，通通都有“祖籍”。粤菜中著名嘅白切鸡、盐焗鸡、手撕鸡、豉油鸡，大多都系由佢哋“献身”。虽然，呢啲名鸡都比饲料鸡好食，但因“祖籍”唔同，所以肉质亦各有千秋，正所谓萝卜白菜各有所爱，大家会各取所需。喺街市区别走地鸡同饲料鸡，可以睇鸡形，但如要从走地鸡中分出“祖籍”，咁就要靠睇鸡毛。

　　比如清远鸡，鸡乸嘅鸡毛系有“三麻身”特点，即背脊嘅鸡毛主要有麻黄、麻棕、麻褐三种颜色，而鸡公嘅胸、腹、尾啲毛就系黑色；又比如封开杏花鸡，鸡毛特点系：嫩鸡全身绒羽淡黄色，鸡公主羽同尾羽系黑色，鸡乸颈部有黑斑点，好似条颈链；再比如龙门胡须鸡，全身黄毛，下颌“独家”拥有一撮令佢名地震天下嘅胡须。

　　宜家啲鸡只只都系全裸出场，咁边只系清远鸡同胡须鸡呢？我记得以前市面上有啲牌子鸡会喺脚度戴个“戒指”以示区别，广州如果实行光鸡冰鲜上市，系未可以照板煮碗学下呢？